من بعدما سالات ساعتك او صافي قضيتي غراض او صوتي على الي قنعك براسووَ او فالغالب " دور معاك " بمئات الدراهم إلي سالات قبل 48ساعة من اليوم، او تعصبتي للانتماء ديالك القبلي او الإقليمي و درتي علامة على الرمز الي خصك تبقى عاقل اعليه... دابا كاين نقاش اخر داير بين الفائزين بالانتخابات المهنية ما فيهش انت او اخر واحد افكرو فيه اكيد هو انت! 

عرفت علاش لان دابا البقاء لمول الشكارة او شكون عندو الزرقالاف ماشي هديك الي شديت او گلتي راه قضيتي غراض، راه الناس دابا كتكلم على عشرات الملايين في إطار شكون يعطي كثر او يقضي غراض، أو شكون لي قدم ضمنات للإستحقاقات الانتخابية القادمة و بالخصوص مجلس المستشارين.
المهم انت دابا فدار غفلون او صحاب الحال خدامين على شكون غادي يتزعم او يشد الرئاسة او وزع لوزيعة على صحابو بعيدا على السياسة او الايديولوجية او البرامج طبعا، أو بعيدا حتى على دوك الوعود الي كانت كتقدم لك.
دابا فين المرشحين الي نجحتي! واش غادي يتشاور معاك فالتحالفات؟ واش غادي اقلبو على مصالحتك كمهني سواءا كنتي تاجر او صنايعي او صباغ و لا حلاق و لا مول صالون و و لا مول شركة...

اليوم صديقي سالات ساعتك او ما بقا عندهم ما اديرو بيك، أو عنداك تبقى من بعد تبكي او تشكي او تقول دازت اعليا او تصيدت، ما تبقاش تبرزط الوقت بذيك اللغة ديال النواح، اليوم صافي ما بقاش عندك اي دور من بعد ما درتي الي كيمثلك فالغرف المهنية، صافي صديقي شد الصف او تفرج فعملية التسير او التدبير بالمنطق ديال الي لبارح كانو كيدور عليك او كيوزنوك بالمال او الوعود.

و فالاخير الله يقلب على هذ لبلاد قلبة ديال الخير او ايجب لها لعفو من عندو، و تبقاوا على خير في انتظار بقية القصة هانا معاك صديقي المعذب في الأرض. 🗣️
🖌️ مول الغرفة المهنية